මතකය මතකයි

කහ පාට මල් පිපි පිපි එල්ලෙන
ඇළ ඉහළ අර ඇහැළ ගහ ගාව
කැරකී කැරකී දැවටුණු
සුවද තාමත් තියෙනවද…
ඉස්කෝල පාරේ ඒ දෙවැට අයිනේ
අපෙ මූණු ඇඹුල් කළ
පේර තාමත් ඉදෙනවද…
සරුංගල් කාලෙට
දුරම දුර ඈත අහසේ
එකිනෙකට පැටළුනු
අපි යැවූ සරුංගල්
ඈතම ඈත ඒ අහස දකිද්දී තාමත්
පැටලි පැටලී දැවටි දැවටී ඉන්නවා පෙනෙනවද…
කියන්නට හිතුණත් නොකියාම නැවතුණු
මට නොකී ඒ කතා
තවම ඔය හිතේ
පරිස්සමට තියනවද…
ඇස් පුරා පොදි ගැහුණු
උතුර උතුරා දෝර ගිය
දිවෙන් එළියට නොපැන්න
“එකම එක අකුරු හතරක මතකය”
මා නමින් තියෙනවද…
නිවි හැනහිල්ලේ
ටිකක් ඇලවෙන්න
ඔය ඇස් පියන් යට
තාමත්…
මට ඉඩක් තියේවිද….?

About these ads